• Название:

    Служба и Акафист, Священномученику Захарии (Лоб...

  • Размер: 0.14 Мб
  • Формат: DOC
  • или



Служба и Акафист, иже во святых отцу нашему Священномученику Захарии, архиепископу Воронежскому. (проект) НА ВЕЛИЦЕЙ ВЕЧЕРНИ: Блажен муж, 1-й антифон.
На Господи, воззвах: стихиры, глас 6: Земля Донская прославися,/ яко в станице Митякинстей/ от христолюбиваго, казачьего корене плод благокрасен прозябе,/ Захарие, отроча благонравное,/ праведному Захарии, отцу Предтечеву, тезоименитое./ В сем же имени, путь ему преднаречеся/, яко священнику и мученику за Христа. Благочестивый Петр, отец твой, священномучениче,/ нарицая тя, Захарией, в честь преподобных Захарии Отверстаго и Захарии Постника,/ желаше, дабы отроча его, память Господню присно имело,/ подобно сим угодникам Божиим,/ и не тща бысть надежда его. Измлада церковь Божию возлюбив/ и благочестия вожделев, святе, / в граде Новочеркасске / во слове Божии и отеческих писаниих, начат поучатися, / богословские познания приобретая. Что убо сотворю,/ киим образом жития моего / Тебе, Богу и Владыце моему, добре послужу? / Киим служением народу Божию полезен буду? / слезно взывал еси ко Господу, блаженне.
Слава, глас 8: Путь священства, / приходскаго служения / избрал еси, блаженне, / святителю Донскому Макарию / рукоположившу тя в иерейский сан, / да укрепляемый благодатию Божией, / немощная врачующей и оскудевающая восполняющей, / Господу и Церкви Христовой послужиши.
И ныне, Богородичен воскресен.
Вход.
Прокимен дне.
И чтения три святительския. На литии стихиры, глас 3: В весях малых, / Нагольно-Голодаевке и Ажинове, / пастырское служение / первоначально проходил еси, блаженне, / поучаяся народ Божий любити, / и самоотверженно ему служити. Прост нравом, / кроток и смирен сердцем / воистину пред Богом явился / течение христианския жизни совершая, / веру соблюл еси, / сего ради в горних обителех упокоился еси, / молися, священномучениче Захарие, / о всех, верою и любовию, чтущих память твою, / да и мы добре на земли поживше, / Царствие Божие улучим.
Слава, глас 8: Бог тя возвеличи, священномучениче отче Захарие, / иерархом Церкви Своея тя поставив, / ты же жребий служения сего / яко волю Его благую восприим, / в святительском подвизе твоем / ревностно подвизался еси / показуя всем верным, / яко ни смерть, ни жизнь, / ни высота, ни глубина, ни иная какая тварь / не может разлучити нас от любви Божией / во Христе Иисусе, Господе нашем. И ныне, Богородичен, глас тойже: К Тебе, о Богомати, / усердно притекающе умильно взываем: / вонми предстательству священномученика Захарии о нас / и Сыну Твоему и Богу нашему / молитвы вознеси о спасении душ наших.
На стиховне, стихиры, глас 2:

Якоже не может укрытися град, вверху горы стояй, / ниже ставят свечницу под спудом, / тако и ты, блаженне, / изведен был Господем на новое служение, / во град Александровск – Грушевский, / да светом добродетелей твоих / осветиши люди в граде сем живущая, / дабы они видя добрыя дела твоя, / прославляли Отца нашего Небесного. Стих:

Уста мои возглаголют премудрость, и поучение сердца моего разум. Бог благослови и освяти тя, граде Александровск – Грушевский, / православным бо людем твоим, / добраго пастыря Захарию дарова, / той не мало зде потрудися, / ко Христу сердца горняков обращая. Стих:

Благовестих правду Твою в церкви велице. Радуйся славнейший град Новочеркасск, / в тебе бо на многая лета / святый Захария поселися, / образ в себе верным являя: / словом, житием, любовию, / духом, верою, чистотою.
Слава, глас 4: Стольный град Тихаго Дона прославися, / пришествием твоим, блаженне,/ в немже мнозе потрудися на ниве Христове, / и в благословленные времена царские, / и в скорбныя лета войны Велицей, / в смутные годины мятежа и братоубийственныя брани, / при иге безбожныя власти./ В нем же и благодать архиерейскую прияти сподобился еси, / и крестный путь свой начал еси. И ныне, Богородичен, глас тойже: Призри на моления Твоих раб, Всенепорочная, / утоляющая лютая на ны восстания, / всякия скорби нас изменяющи, / Тя бо Едину твердое и известное утверждение имамы / и Твое предстательство стяжахом, / да не постыдимся, Владычице, Тя призывающии, / потщися на умоление Тебе верно вопиющих: / радуйся, Владычице, всех помоще, / радосте и покрове, / и спасение душ наших.
Тропарь, глас 4: Пастырю добрый и страдальче изрядный, / душу свою за овцы Христовы, положивший, / сего ради венец нетленный стяжавший, / и одесную Христа, яко победитель воссевший, / отче священномучениче Захарие, / моли Христа Бога, / спастися душам нашим. НА УТРЕНИ На Бог Господь: тропарь святителю дважды.
Слава, и ныне, Богородичен. По 1-м стихословии седален, глас 2: Жезл святительский дерзновенно восприял еси, святе, / в годину страшных гонений на Церковь Русскую, / вместо предлежащей иерарху чести и славы, / горькую чашу страданий испив, / еще же и уз темничных , / работ горьких, / болезней многих, / мразных островов Соловецких, / гладных степей Карагандинских, / вся сия добре претерпел еси, / яко добрый воин Христов. / И ныне, яко победитель, / на престоле Христовом, с Христом воссевший. / Моли Его о пастве твоей , / еяже ради и душу свою положил еси. Слава, и ныне, Богородичен, глас тойже: Покрый нас всемощным покровом Твоим, / Всемилостивая Владычице Богородице, / защити нас от всяких сетей вражиих, / дадеся бо Ти благодатная сила, / яко рождшей Владыку Христа и Спаса душ наших. По 2-м стихословии седален, глас 5: Благодарение Богу, / воздадите казаци донские, / Той бо воздвиже в роду вашем, / угодника Своего и молитвенника за Тихий Дон, / святаго Захарию./ Ликуйте и людие воронежские, / се бо молит святитель Божий Захария о вас Бога, / вкупе со святители Воронежскими Митрофаном, Тихоном, Антонием, Петром и Тихоном. / Веселись и ты, земля Карагандинская, / освященная мученической кровию святаго Захарии, / и приявшая его святые мощи. Слава, и ныне, Богородичен, глас тойже: Утоли, Владычице, / болезни душ наших. / Радостию благодатною о Тебе исполни сердца наша, / на Тя бо надеющиися / причастницы жизни вечныя будем.
По полиелеи седален, глас 8: Приидите, верних собори, / усердно восхвалим святителя предивнаго, / Захарию блаженнаго, / иже достойно крест свой, / чрез все житие свое понесе, / и пройде чрез огонь и воду, / вшел еси в покой, / его же и нам, да дарует Господь, / молитвами угодника Своего. Слава, и ныне, Богородичен:

Буди благословен день и час,/ в онь же благоволи Господь Тобою, Пречистая Богородице, / явити Спаса миру, / сим же нам имети Тя яко дерзновенную Предстательницу и Ходатаицу пред Сыном Твоим / о спасении душ наших.
Степенна, 1-ый антифон 4-го гласа. Прокимен, глас 4:

Священницы Твои облекутся в правду и преподобнии Твои возрадуются. Стих:

Блажен муж, бояйся Господа, в заповедях Его восхощет зело.
Всякое дыхание:

Евангелие от Иоанна, зачало 36. По 50-м псалме стихира, глас 6: Церковь Божию преискренне возлюбив,/ жертвенно Ей послужил еси,/ послушлив быв Ей до смерти, / смерти же крестныя/. Сего ради причислен быв,/ к Собору Новомучеников и Исповедников Российских, / с ними же моли Христа Бога нашего, / да спасется земля Русская.
Канон священномученику, глас 6 Песнь 1 Ирмос:

Яко по суху пешешествовав Израиль, / по бездне стопами, / гонителя фараона / видя потопляема, / Богу победную песнь поим, вопияше. Песнь воспети Твоему угоднику, егоже избрал еси, / священномученику Захарии,/ сподоби, Господи, нас недостойных, / и восхвалити его святое житие и подвиги,/ имиже украшен Горнего Сиона достигл еси.
Якоже плод красен спасительного сеяния Божия / явился еси в земле Донстей, священномучениче Христов, / родителей благочестивых, быв отрасль пречестная. От юности твоея суетныя славы и мирския чести отрицаяся, / на гору добродетелей востекл еси, блаженнее, / славы Христовой ища и Тому прилежно работая. Богородичен:

Спаси нас от всяких бед, / Всемилостивая Владычице Богородице, / и Твоя милости людем Твоим подаждь, / страстотерпца Христова мольбами, / Милостивая сущи, Милостиваго явилася еси Мати.
Песнь 3 Ирмос: Несть свят, / якоже Ты, Господи Боже мой, / вознесый рог верных Твоих, Блаже, / и утвердивый нас на камени / исповедания Твоего. Яко елень на источники водныя, / к познанию богословия в вертограде духовнем устремился еси,/ и сие многий плод в церковном служении твоем принесе. Егда Пастыреначальник Христос, / к пастырству тя призва и благодати священства сподоби, / жребий приходскаго служения в весях малых и бедных, / прияти изволил еси, / сим нас поучая, покорятися воли Господней, / и вся принимати от руки Его. Сельскую паству твою, добре управив, / священномучениче Захарие, / Господем был изведен на новое место служения, / в град Александровско – Грушевский, / да и обильнейший плод принесешь, / возвращая сердца людския к Богу отцов их. Богородичен:

Обышедше обыдоша нас грехи наша, / обыдоша нас беззакония наша, яко пчелы сот, / и страсти наша разгорешася, яко огнь в тернии/ но молитвами Твоими, Пречистая отжени от нас враги наша, / пленения сего греховнаго избави, / и на стезю покаяния настави нас. Седален, глас 1: Пастыреначальнику Христу подражая, / душу свою за паству твою полагал еси, священномучениче, / темже Горняго Иерусалима с соузниками твоими и чады достигл еси, / идеже молиши Бога о нас, / светло празднующих твою память.
Слава, и ныне, Богородичен, глас тойже: Спасай нас, Всесвятая Царице, / от сопротивных обстояний и соблазнов бесовских, / и умоли Сына Твоего и Господа нашего, / да возведет от истления к жизни вечней, / всех усердно к Тебе прибегающих. Песнь 4 Ирмос:

Христос моя сила, / Бог и Господь, / честная Церковь боголепно поет, взывающи, / от смысла чиста, о Господе празднующи. В граде Александровско-Грушевском много потрудился еси , блаженне,/ сея в сердцах горняцких семена евангельской истины, / разбивая камни неверия и посекая терния крамолы, / да принесут они мног плод, / и будут сынове Вышнего вси. Радуйся и веселися, граде Александровско-Грушевский, / тебе бо Господь молитвенника и печальника, / святаго Захарию дарова, / той бо и ныне престолу Господню предстоя, / молится о спасении людей твоих. В учении мнозем, / в служении, посте и молитвах пребывая, / трудился еси, святе, / во градех донских, / Александровско-Грушевске и Новочеркасске, / да насельников их, Христу приобрящеши. Богородичен:

Достойно есть прославляти Тя, Владычице, / присно спасающую землю Донскую, / молитвами Новомучеников и Исповедников Донских, / и угодников Божиих на земле Донской просиявших. Песнь 5 Ирмос:

Божиим светом Твоим, Блаже, / утренюющих Ти души любовию озари, молюся, / Тя ведети, Слове Божий, / истиннаго Бога, / от мрака греховнаго взывающа. Смотрению Божию последуя, / и велению Матере Церкве повинуяся, / преселился еси, / в град Новочеркасск, блаженне,/ идеже многия лета пребывая, / трудился еси на ниве Христовой. В скорбныя лета войны Велицей, / непрестанно молился еси святе, / о сродниках твоих и пастве, / христолюбивом воинстве казачьем, / за Веру, Царя и Отечестве, / живот свой полагавших, / да верностью царю земному и Отечеству, / угодны будут Царю Небесному, / и Горнее Отечество обрящут. За скорбью войны Велицей, / еще более страшныя времена приидоша, / мятежа, свержения законныя власти, / братоубийственныя брани, / разрухи и глада,/ гонения на Церковь Божию, / вся сия в граде Новочеркасске претерпел еси, святе, / и видя волков грядущих, паству свою не оставил еси. Богородичен: О Тебе радуется, Благодатная,/ Церковь Небесная и земная, / ангели и человецы согласно воспевают Тя , / и Родшегося от Тебе, / Спаса бо родила еси душ наших.
Песнь 6 Ирмос: Житейское море, / воздвизаемое зря напастей бурею, / к тихому пристанищу Твоему притек, вопию Ти: / возведи от тли живот мой, / Многомилостиве. Изволися Духу Святому со иерархи, / поставити тя, блаженне, епископом Церкви Русския, / на тойже земле Донской, / идеже родися, духовное образование получе, / благодать священства восприя, / неленностно Богу послуже, / здесь же и крестный путь свой начал еси. Архипастырем добрым был еси, священномучениче Захарие, / немудрыя просвещал еси, / малодушныя укреплял еси, / отчаянныя утешал еси и немощи немощных носил еси, / всех к богоугодному житию управляя, / да во дни испытания веры, / крепкое в ней стояние имуще,/ Царствие Божие наследят. Страданий за Христа не отрицаяся, / на путь исповедничества и мученичества стал еси, страдальче Христов, / узы темничныя, оскорбления и страдания, / полной чашей испил еси, / еще же заключение на мразнех островех Соловецких, / идеже вкупе с ликом соузников своих, / доброе свидетельство о Христе явил еси. Богородичен:

Не имамы иныя помощи, ниже надежды Пречистая, / Ты нам помози, / вонми предстательству святителя о нас, / и Сыну Твоему молитвы вознеси о спасении душ наших.
Кондак , глас 2: Смирен сердцем и кроток духом, / во дни испытания веры,/ крепчае адаманта веру и любовь ко Господу явил еси, / святителю Христов Захарие,/ Темже молися и о нас, чтущих память твою, / да и мы, молитвами твоими, устоим в вере православной.
Икос, глас 8: Похвальные песни воспоим святителю и мученику, / доброму пастырю, душу свою за овцы своя положившему, / молитвеннику и печальнику за земли Донския и Воронежския, / узнику Соловецкому и страдальцу Карагандинскому, / к нему же с верою и любовию припадем, взывающе: / радуйся, Единаго Бога, паче всего в жизни земной любивый; / радуйся, Им только и живый; / радуйся, присно волю Господню исполнявый; / радуйся, страдания и мучения радостно приявший;/ радуйся, одесную Христа в Горнем Иерусалиме ставший; / радуйся, священномучениче Захарие, отче наш. А К А Ф И С Т. Кондак 1 Избранный исповедниче и священномучениче Христов, поборниче святыя веры православныя, тебе, яко молитвеннику нашему и скорому помощнику, составим похвалу; ты же, яко имеяй дерзновение ко Господу, от всяких нас бед свободи, да зовем ти:

Радуйся, Захарие, милостивый наш пред Богом заступниче. Икос 1 Ангелов сомолитвенниче и человеков наставниче, предстоя ныне с вышними лики Престолу Всевышняго, священномучениче Захарие, молиши о нас Христа Бога нашего.
Сего ради мы благодарне вопием ти:

Радуйся, Захарие, отцу Иоанна Крестителя тезоименитый; радуйся, подобно ему священномучениче нарочитый.
Радуйся, подобно преподобному Захарии Отверстому, сердце свое для людей, присно отверстым имевый; радуйся, подражая Захарии Постнику, строгим постником бывый.
Радуйся, память о Господе, воплощенная; радуйся, память о чтущих тя, несумненная.
Радуйся, Захарие, милостивый наш пред Богом заступниче. Кондак 2 Видевше, яко в мире сем вся суете и тлению причастна, измлада Христа возлюбил еси, блаженне Захарие, и паче всих Ему Единому работати вожделев, к житию добродетельному устремился еси.
Темже и наша сердца, молитвами твоими, воспламени любовию ко Господу, да согласно Ему воспоем:

Аллилуиа.
Икос 2 Разум свой просветив богословским учением, в донском духовнем вертограде, к пастырскому служению себя усердно готовил еси, егда же святитель Донской Макарий рукоположи тя в священный сан, с радостию вступил на поприще служения сего, многим став отцом духовным и учителем.
Мы же почитая пастырский подвиг твой, приносим похвалы сицевыя:

Радуйся, благодати священства дивное благоухание; радуйся, в скорбях непреложное наше упование.
Радуйся, душу свою, за паству свою полагавый; радуйся, путь крестоношения радостно избравый.
Радуйся, пастырю добрый; радуйся, молитвенниче бодрый.
Радуйся, Захарие, милостивый наш пред Богом заступниче. Кондак 3 Сила Вышняго укрепляше тя, блаженне, егда исшел еси на проповедь Слова Божия насельникам донских весей и градов, темже мног плод она принесе, и мнозие люди научишася, благодарственно пети Богу:

Аллилуиа. Икос 3 Имея в лице твоем, страстотерпче, заступника и молитвенника, зело радуется земля Донская, веселится земля Воронежская, ликовствует земля Карагандинская, ихже подвигом цельножизненным освятил еси, приносяще тебе таковая:

Радуйся, града Александровско-Грушевскаго молитвенниче; радуйся, града Новочеркасска заступниче.
Радуйся, земли Донския славное украшение; радуйся, земли Воронежския крепкое заступление.
Радуйся, Соловецкий исповедниче; радуйся, Карагандинский священномучениче.
Радуйся, Захарие, милостивый наш пред Богом заступниче. Кондак 4 Бури мятежа и крамолы, братоубийственныя брани и гонений на Церковь, не устрашился еси, Захарие.
Видя волков грядущих, свою паству не оставил еси, но вся, еже даде тебе Господь претерпел еси, благодарно поя Тому:

Аллилуиа. Икос 4 Слышавше златословесныя поучения твоя, и видивше доброе житие твое, мнозие людие града Александровско-Грушевского прославиша Отца нашего Небесного, и ныне насельники града сего, вспоминая светлое житие и подвиги твоя, согласно воспевают ти:

Радуйся, града нашего святый покровителю; радуйся пред Господом, о граде нашем ходатаю.
Радуйся, горняцких сердец и умов просвещение; радуйся, неусыпное молитвенное горение.
Радуйся, вкупе со священномучеником Александром Команским о находящихся в рудных трудах усердные молитвенницы; радуйся, дивное порождение Митякинския станицы.
Радуйся, Захарие, милостивый наш пред Богом заступниче.
Кондак 5 Боготечней звезде Вифлеемстей, был подобен еси святый Захарие.
Звезда бо оная привела ко Христу волхвов с дарами, сице и ты привел многия люди ко Христу, да принесут Ему в дар свои веру, надежду и любовь, воспевая:

Аллилуиа Икос 5 Видевше в тебе новочеркасстие людие добраго пастыря, возрадовашася радостию неизреченною.
Ты же добре внимая себе и стаду, в немже быти пастырем поставлен еси Господем, образ был еси всем верным, словом, житием, любовию, духом, верою и чистотою.
Сего ради насельницы града Новочеркасска молитвенно воспоминая тя, благодарственно приносят похвалы сия:

Радуйся, град Новочеркасск многолетним своим зде пребыванием, молитвами и трудами освятивый; радуйся, святый казаче в Войсковом соборе многия лета усердно Богу служивый.
Радуйся, донскаго казачества отрасле пречестная; радуйся, слава казачьего рода неземная.
Радуйся, служителю Христов кроткий и смиренный; радуйся, молитвенниче о всех нас дерзновенный.
Радуйся, Захарие, милостивый наш пред Богом заступниче. Кондак 6 Проповедник воистину божественныя любве явился еси отче Захарие, неленностно проповедуя, яко несть большея любве, как положити живот свой за други своя, за Отечество и Святую веру, и приняти венцы мученическия от Подвигоположника Христа, воспевая Ему:

Аллилуиа.
Икос 6 Возсия в тебе новый народолюбец, Моисею и Павлу подобный, Захарие блаженне, Моисей убо моляше Господа, да не воспламенится гнев Господень на народ его и да простит Господь людей по велицей Своей милости и бысть тако.
Павел же скорбя о народе своем, о ожесточении сердец их, свидетельствовал о велицей своей печали, непрестанных сердечных мучениях о народе своем, желаше быти самому отлученну от Христа за братьев своих, да спасение улучат.
Сице и ты святче Божий, терзаяся сердцем молился Господу о спасении страждующего Отечества мучимаго нашествием иноплеменников и междуусобными войнами, о спасении народа российскаго в братоубийстве пребывающего, о спасении любезнаго тебе воинства казачьего, прежде христолюбиваго, ныне же забывшаго Христа.
Видя таковую любовь твою к народу и Отечеству нашему, благодарственно воспеваем ти сице:

Радуйся, за победу России в войне Велицей неустанно моливыйся; радуйся, о погибших воинах сердечно скорбевый.
Радуйся, спасения Отечества в годину мятежа, свержения законныя власти и братоубийственныя брани, паче всего желавый; радуйся, донских казаков на защиту Тихаго Дона благословивый.
Радуйся, в страшную годину страданий паству свою не оставивый; радуйся, все ниспосланные скорби до конца претерпевый.
Радуйся, Захарие, милостивый наш пред Богом заступниче. Кондак 7 Хотя Пастыреначальник Христос, явити тя миру, да не сокрыт будет светильник добродетелей, но да светит всем, изведе тя на новое многотрудное, архипастырское служение.
Сему Божию промышлению дивящеся, со умилением зовем:

Аллилуиа.
Икос 7 Новаго видяще тя святителя Божия в земли Донской, издалеча притекаху к тебе вернии в скорбех и болезнех, утешения и молитвы у тебя прося, и был по глаголу Апостолову всем вся, да всяко некия спасешь, блаженне, и малое время радовались людие донския имея таковаго молитвенника и печальника, обаче Господь хотяще мученической славой украсити тя, нечто иное о тебе предусмотри, и с земли Донской скорбный путь твой нача.
Сего ради сицевое пение приносим тебе:

Радуйся, святителю Божий, в день Рождества Пресвятыя Богородицы, благодать епископства получивый; радуйся, через неколикия лета, в тойже праздник, мученическую кончину приявый.
Радуйся, в граде Новочеркасске, в немже многия лета священствова, святителем недолзе послужи; радуйся, в том же граде, не токмо духовный, но и крестный путь свой нача.
Радуйся, архипастырю Нижне-Чирский; радуйся, святителю Аксайский.
Радуйся, Захарие, милостивый наш пред Богом заступниче. Кондак 8 Странники и пришельцы есмы в мире сем, по речению апостольскому, не имамы зде пребывающего града, но грядущаго, Небеснаго взыскуем, сего ради и ты, святителю, странствуя по тюрьмам, лагерям и ссылкам, взыскивал еси града Небеснаго, воспевая в сердцем своем Христу Богу:

Аллилуиа.
Икос 8 Вся ниспосланное от руки Господней, безропотно приял еси, священномучениче, тюрьмы, этапы, пересылки различныя, еще же и заключение на хладных островех Соловецких, идеже с сонмом страждущих там архипастырей, дерзновенно безбожныя власти свидетельствовал еси, яко жива Церковь Русская, и врата адовы не одолели Ю. Сего ради почитая Новомучеников и Исповедников Соловецких, ваше мужество и терпение, сице тебе благоговейно поем:

Радуйся, священномучениче Захарие, на святых Соловецких островех поживый; радуйся, многия страдания здесь за Христа приявый.
Радуйся, вся страдания сия мужественно претерпевый; радуйся, безбоязненно о страждущей Церкви Русской свидетельствовавый.
Радуйся, Преподобных Зосимы, Савватия, и Германа и иных Соловецких Преподобных угодников Божиих, сомолитвенниче; радуйся, Священомучеников Илариона Верейскаго, Евгения Горьковскаго, Серафима Кавказскаго и иных многих Новомучеников и Исповедников Соловецких соисповедниче.
Радуйся, Захарие, милостивый наш пред Богом заступниче. Кондак 9 Всякия утоли печали, святый наш заступниче Захарие, всех усердно к тебе притекающих и молитвенныя помощи твоея просящих, да желаемое улучивше, благодарными сердцем и устами воспоют Богу:

Аллилуиа. Икос 9 Витийство человеческое не возможет изрещи вся подвиги твоя, страдания, скорби, уничижения, болезни и лишения, яже ради Христа и Святей Матери - Церкви претерпел еси, страдальче Христов Захарие.
Темже терпению твоему дивяся воспеваем ти сице:

Радуйся, твоими бо подвигами и мужеством сатана посрамляется; радуйся, твоею верою и любовию вера Христова утверждается.
Радуйся, Пресвятыя Троицы достойный служителю; радуйся, святых в Небеснем Граде пребывающих сожителю.
Радуйся, земли Марийския своею ссылкою освятивый; радуйся, в земли Тверской малое время послуживый.
Радуйся, Захарие, милостивый наш пред Богом заступниче. Кондак 10 Спасти хотя воронежскую паству от лютых волков губящих ея, священноначалие Церкви Русския посылает в Воронеж добраго пастыря и смелаго воина Христова, священномученика Захарию, да добре упасет словесные овцы стада Христова в земле Воронежской, да согласно вси Богу воспевают:

Аллилуиа. Икос 10 Стена тверда явился еси блаженне, людем воронежским защищение, и утешение всем его у тебя ищущим, по вся дни подобно апостолу языков, умирал еси, сострадая своей пастве и заботясь о Церкви Воронежской.
Благодаря твоим молитвам и усердию, сохранились многия храмы воронежския, в страшную годину их повсеместного разрушения.
Сего ради людие воронежския, благодаряще тя воспевают:

Радуйся, для всея земли Воронежския бывый дивное утешение; радуйся, града Воронежа и воронежских храмов крепкое защищение.
Радуйся, в слове Божием непрестанно паству воронежскую наставлявый; радуйся, дерзновенно безбожныя власти обличавый.
Радуйся, святителей Воронежских, Митрофана, Тихона и Антония сопрестольниче; радуйся, священномучеников Воронежских, Тихона и Петра сострадальче.
Радуйся, Захарие, милостивый наш пред Богом заступниче. Кондак 11 Пение сие хвалебное от сердец наших приносимое, не отвержи, Захарие блаженне, аще и слышиши ныне сладчайшия райския пения, воспевающия Богу:

Аллилуиа. Икос 11 Светозарное житие твое, святителю Божий Захарие, мученическим венцем увенчася, се бо исполнися на тебе слово евангельское глаголющее егда состареешеся, ин тя пояшет и ведет, аможе не хощещи, уже старцу немощну и претрудну ти сущу, паки заключен был еси в узилище, осужден судом неправедным на смерть в лагерях пустынныя земли Карагандинския, идеже многия муки, слепоту и прочия болезни претерпе, тамо же и кончину мученическую восприя и погребен бысть безвестно с прочими страдальцами тамо невинно убиенными.
Мы же чтуще честная страдания твоя, яже за Христа претерпел еси, блаженне, сия похвалы тебе приносим:

Радуйся, страданиями твоими утвердивший правоверие; радуйся, всем житием твоим, наипаче же кончиною, обличивший маловерие и неверие.
Радуйся, кровию своею освятивый земли Карагандинския; радуйся, святый покровителю земли Казахстанския.
Радуйся, вкупе со Священномучениками Карагандинскими Евгением Горьковским, Дамаскиным Глуховским, Сергием и Уаром Елецкими убиенный; радуйся, вместе с ними и иными Новомучениками и Исповедниками Российскими у Господа прославленный.
Радуйся, Захарие, милостивый наш пред Богом заступниче. Кондак 12 Благодать приял еси от Бога, всехвальне Захарие, молитися о всех с верою и любовию чтущих святую память твою, темже и мы празднуя оную по долгу, к заступлению твоему усердно прибегаем, и благодаряще Бога давшего нам таковаго молитвенника благодарно вопием Ему:

Аллилуиа. Икос 12 Поюще твое светлое житие, священномучениче Захарие, почитаем подвиги и труды твоя, злострадания и мучения яже за Христа претерпел еси, еще же ублажаем мученическую смерть твою, и тебе яко предстателю нашему небесному вопием:

Радуйся, добропобедный воине Царя Небеснаго; радуйся, верный сыне Отечества земнаго.
Радуйся, великий Христов угодниче; радуйся, о роде нашем усердный молитвенниче.
Радуйся, Церкви Торжествующей славо; радуйся, Церкви Воинствующей похвало.
Радуйся, Захарие, милостивый наш пред Богом заступниче. Кондак 13 О пастырю наш предобрый и страстотерпче изрядный, блаженне Захарие! Приими наше сие малое моление и испроси нам у Христа Бога в вере утверждение, в скорбях терпение и крепкое на Бога упование, да укрепляеми Божественною благодатию возможем противостати всем искушениям вражиим, и тако вечныя жизни достигнем, идеже с тобою и всеми святыми будем воспевать Святей Троице:

Аллилиуа, аллилуиа, аллилуиа. (Сей кондак глаголи трижды, затем икос 1-ый и кондак 1-ый). Песнь 7 Ирмос:

Росодательну убо пещь / содела ангел / преподобным отроком, / халдеи же опаляющее веление Божие, мучителя увеща вопити: / благословен еси Боже отец наших. Соловецких Преподобных сомолитвенниче, / Соловецких Мучеников и Исповедников сострадальче, / явился еси блаженне отче Захарие, / темже и ныне с ними в Горнем Царствии вечныя славы наслаждаешися, / с ними же моли Господа славы не лишити оныя и нас, грешных.
Земля Марийская обрадовася пришествием твоим отче, / в нюже сослан был еси, / и еяже освятил еси своими молитвами, / непрестай славне Захарие, / и ныне молитися о земле сей и народе ея, / да не погибнет оный в мрачнем язычестве, суевериях, люторовой ереси и сектанстве.
В древней земли Тверской, / малое время, служил еси отче Захарие, / молитвенно предстательствуя пред Господом о насельниках ея, / да не оскудеет в них вера Православная, / темже и святым земли Тверской, / явился еси усердный сподвижниже. Богородичен:

Милосердия двери, отверзи нам, / благословенная Богородица, / священномученика мольбами, / и того молитвами избави нас от бед, / и сподоби обрести рай, / Ты бо еси Благая Вратарница, / двери райския верным отверзающая. Песнь 8
Ирмос:

Из пламене преподобным росу источил еси / и праведного жертву водою попалил еси: / вся бо твориши, Христе, токмо еже хотети, / Тя превозносим во вся веки. Граде Воронеже возрадуйся, / и земля Воронежская возликуй, / вам бо Господь посла, / добраго пастыря, / да упасет стадо Христово, / в годину страшных искушений, / и сбережет его от волков стремящихся погубить е. Святителей Митрофана, Тихона и Антония, / сонаследниче и сопрестольниче, / явился еси святителю Божий Захарие, / с ними же молися Господу, / да спасет Господь Землю Русскую, / и укрепит Православие на Земле Воронежской. Добрым архипастырям Воронежским Тихону и Петру, подражая, / душу свою за овцы паствы Воронежския, / положил еси, / священномучениче Захарие, / темже кровию вашею утвердися Церковь Воронежская, / и стоит град Воронеж и по сей день. Богородичен:

Взбранной Воеводе победительная, / яко избавльшеся от ига безбожныя власти, / Твоим заступлением, / и Новомучеников и Исповедников Российских мольбами, / благодарственно вопием Ти: / радуйся, Невесто Неневестная. Песнь 9 Ирмос: Бога человеком не возможно видети, / на Негоже не смеют чини ангельстии взирати: / Тобою же, Всечистая, явися человеком Слово Воплощено, Егоже величающе, с Небесными вои Тя ублажаем. В земли гладные и пустынные сослан был еси, / на страдания и смерть, / в узы горькия, / страстотерпче Христов Захарие, / идеже многия муки и болезни претерпел еси, / и венец мученичества восприял еси, / с многими Новомучениками Карагандинскими, / с нимиже молися ко Господу, / да спасет Господь христиан в земле агарянской. Земля Казахстанская освятися, / подвигами вашими, страданием и кровию, / святие мученицы Карагандинския, / еще же и святыми мощами вашими, / в братских могилах погребенными, / имиже агарянская земля в антиминс превратися, / сего ради вами хранимые христиане, / благодарно и благоговейно почитают святую память вашу.
Угодниче Божий Захарие, / вкупе с сострадальцами своими, / святыми мучениками Карагандинскими, / и святыми мученицами Акмолинскими, / моли Господа и Пречистую Его Матерь, / спасти землю Казахстанскую.
Богородичен:

Утоли наша печали, / Всемилостивая Владычице наша
Богородице, / и отри всяку слезу со скорбных очей христианских, / Ты бо еси, Единая, Нечаянная Радость всех скорбящих.
Светилен, глас 1: Священномученика Захарию днесь прославим, / память его благочестно празднующе,/ и потщимся усердно его светозарному житию подражати, / тое бо сияя, яко звезда Вифлеемская, / ко Христу путеводит.
Слава, и ныне, Богородичен: Рождеством Твоим мир просветившая, / и по Успении его не оставившая, / Дево Пречистая и Пренепорочная, / покрый нас от всякаго зла, / честным Твоим омофором.
На хвалитех стихиры, глас 4 : Захарию святителя, / добраго пастыря и учителя, / правило веры и образе кротости, / благочестия наставника и чистоты, / Церкве поборника и Православия ревнителя, / по вся дни за Церковь умеравшаго, / и душу свою за овцы Христовы положившаго, / немолчно сердцем и усты восхвалим. Захарию священномученика, / узы горькия, и страдания многия ,/ и болезни тяжкия, кротко претерпевшаго, / кровию своею Церковь Русскую утвердившаго, / и мощами своими землю Казахстанскую освятившаго, / приидите собори верных,/ песньми духовными воспоим. Захарию преподобнаго, / воина Христова непобедимаго, / в подвизех поста и молитвы неустанно подвизавшегося, / плотское мудрование воздержанием умертвившаго, / чистоту сердечную стяжавшего, / и безстрастия достигшаго,/ ангели и человецы благочестно ублажим.
Слава, глас 8: Кровию святых, / Церковь Христова утверждается, / кровию Новомучеников Российских, / да утвердится и Церковь Русская, / и на мощах святых, / да возродится многострадальное Отечество наше, / о нем же молился и молится неустанно, / святитель Божий и агнец Христов, Захарие. И ныне, Богородичен: Пречистая и Преблагословенная, / Дево Марие, Богородице, / благоволила еси священномученику Захарии, / в день Рождества Твоего сан святительский восприяти, / в той же день и мученическаго венца его сподоби, / и в Небеснем Царствии его прослави. / Темже о Царице Небесная, / молитвы угодника Твоего Захарии, услыши, / о державе нашей Российстей и народе ея, / и спаси Землю Русскую. Славословие великое и отпуст. На литургии служба святительская. Молитва Первая.
К тебе, о досточудный святителю и страстотерпче Христов, отче Захарие, мы грешнии и недостойнии, усердно притекаем и со умилением взываем ти: призри милостивно с высоты святыя славы твоея на Отечество наше и на нас, тя почитающих и прославляющих святое житие твое.
Сердцем своим милующим, благодати Святаго Духа преисполненным, призри на скорби и прошения наша, и коемуждо по его молитвам воздай.
Немощствующия и болящия исцели, скорбящия и унывающия утеши, малодушныя и маловерныя в вере Христовой укрепи, помраченныя страстями и пороками к покаянию приведи.
Хладныя сердца наша возжги любовию твоею.
Священствующим помози добре совершать служение свое.
Монашествующих в их подвизе укрепи.
Семейныя огради миром и любовию.
Заключенныя в горькия узы, свободи.
В рудных и иных тяжцех работах сущих, скорый помощник буди.
Ты бо еси добрый пастырь и милостивый отец наш, и молитвами твоими надеемся прейти воздушныя мытарства, и обрести Горнее Царствие, идеже ты со ангелы и всеми святыми предстоиши Престолу Святыя Троицы, славяще Безначального Отца, со Единородным Его Сыном, и Святым, и Благим, и Животворящим Его Духом во веки веков.
Аминь. Молитва иная. (Казачья) О препрославленный сыне Тихаго Дона, пречестная отрасле донскаго казачества, священномучениче Захарие! Прими малое моление наше, о сродницех твоих, по плоти, и малой Родине твоей, тебе приносимое, и вкупе со Священномучеником Ермогеном Московским, Святителями Димитрием Ростовским и Иоасафом Белгородским, Преподобными Матфеем Чернеевским и Андреем Каирским, Священномучеником Николаем Поповым и иными святыми казацами, моли Милостиваго Христа Бога нашего, и Его Пречистую Матерь о еже возродитися донскому и всему российскому казачеству, о еже преодолети вся расколы в казачестве быти имущия, о еже быти ему воинством Христолюбивым, достойным своих славных предков.
Молитеся присно и о избежании Тихим Доном, Кубанью, Тереком и всем Отечеством нашим, нашествия иноплеменных и междуусобныя брани, да никогда пусть не подымет брат на брата руку свою! Молися, о Освященный Соборе Казачьих Святых, о еже быти казачеству Богу любезным, а врагом нашим грозным! Мы же недостойныя сродницы ваша по плоти, усердно вас здесь прославляюще, молитвами вашими, да сподобимся и в Небесном Отечестве прославляти Святую Троицу и Пречистую Богородицу, во веки веков.
Аминь. Молитва иная. (Шахтёрская)
Церкви Российския похвало, земли Донския и Воронежския славо и утверждение, градов Новочеркасска и Александровск-Грушевска стено необоримая, града Новошахтинска молитвенный щите, священномучениче отче Захарие! Во дни земнаго жития твоего, пастырем добрым и усердным был еси, и всем сердцем любил еси паству свою горняцкую, в граде Александровск-Грушевском сущую и в горьких рудных работах трудящуюся.
Денно и нощно молился о них, еси святе, да облегчится труд их, да сподобятся они целыми и невредимыми вернуться из рудников своих, да не ожесточятся от тяжкия работы сердца их, и да пребудут они верными сынами Отечества своего и добрыми христианами.
Темже и ныне, молимтися тебе усердно, вкупе со священномучеником Александром, епископом Команским, покровителем рудокопов и угольщиков, молитвенно предстательствуйте присно перед Господом, о всех угольщиках и рудокопах, в тяжких, рудных работах труждающихся, о еже сохранити их невредимыми в чреве земнем, и избавити их от обвалов, земли трясения, потопления, газа смертоноснаго, и от всякия иныя напасти им грозящия.
Молитеся ко Господу и погибших в рудных работах горняках, да простит Господь их согрешения вольныя и невольныя, и усладит их вечной, небесной жизнью, за горечь и скорби жизни земныя, временныя.
Молитеся к Царице нашей Богородице, о семьях горняцких, да пребудут в них присно любовь, мир и согласие, да утолит вся печали Пречистая Дева, в семьях потерявших кормильцев, да будет Она горняцких вдов заступление и сиротствующих чад шахтерских Мати.
Молитеся ко Господу, да сохранит Господь все грады и селения шахтерския, и в них живущим мир и многолетие подаст, да славим все единодушно Отца и Сына и Святаго Духа, Троицу Святую и Единосущную во веки веков.
Аминь. HYPER13 PAGE HYPER15 18